Ganito kita Pinaikot

Ni Leonilyn Palaran

Ganito na sana ang Pilipinas na iyong maaabutan

Sa pagmulat ng iyong mga mata sa Perlas ng silangan

Mga nagkalat Sanggano’t magnanakaw

Sa Quiapo at Cubao,

Wala ka nang makikitang

May trabahong disente at matino ang paraan ng pamumuhay

Ang bawat Pilipino.

Ganito na ang Pilipinas na iyong maabutan

Sa pagsamyo sa ganda ng kalikasan

Kapag umulan, bumabaha agad sa metropolitan

Malawak na polusyon ang bumabalot sa buong kalunsuran

Wala ka nang matatamansang

Puno at halamang tunay, hindi artipisyal

Nakapalibot sa buong kapaligiran

Ganito na ang Pilipinas na iyong maabutan

Sa pag-abot ng rurok ng tagumpay ng isang kabataan

Pinapatay ang pangarap ng kanilang kamusmusan ng bagong Pilipino

Na mga taong ang hilig ay hilahin pababa ang mga progresibo

Wala ka nang matatanaw

Mga pilipinong naghahabi ng sariling pangarap

Nagpapanatili ng kaisipan ng pagiging tunay na makabayan

Ang bawat Pilipino

Ganito ang Pilipinas na iyong maabutan

Sa pagpapaunlad ng ekonomiya ng ating sintang Pilipinas

Mga gahaman, monopolyo ang negosyo sa lahat ng lalawigan

Mga mapang-mata, hindi binibigyang pagkakataon na gumanda ang buhay ng iba

Wala ka nang maoobserbahan na

Pinapaunlad ang sarili, gayundin ang pamumuhay ng kababayan

Umuusbong ang bagong ideya at kaisipan

Sa bansang pagkakaisa ang pangangailangan

Ganito na ang Pilipinas na iyong maaabutan

Walang maipagmamalaki ang sariling pagkatao,

Walang kwenta ang pagiging Pilipino

Sapagkat wala nang pilipinong nagsasambit na

“Pilipino ako! Pilipinas ang Pinagmulan ko!”

Ganito ang ating pinagsisigawan

Habang tayo mismo’y umuunlad sa sarili nating bayan

Ganito kita pinaikot

Pumasok sa iyong bibig, nginuya at inibig

Hanggang sa ang puso mo, ito’y umabot

Paunti-unti hanggang ika’y masuka at tiyan mo’y kumirot

Kailangang baligtarin ang pagbasa mula sa huli hanggang unang taludtod
Ang tulang ito na aking hinabi sa isip at damdamin

Ganito kita pinaikot

Si Papa ay Si Mama
NI : Hazel Ann Lunas

Ikaw na siyang unang nagpapalit noon ng aking lampin
Unang humele sa akin
Habang wala si Ina
Aking gatas ikaw ang tagatimpla

Ikaw na nag-aayos
Ng buhok pagpasok ko
Tagasaing na nga,
Tagaluto pa ng baon ko
NagPAPAkain pag alam na gutom ako

Ikaw na tagalinis ng bahay
Kuskos, kaskas, walang tigil ka
Pati tambak na labahin di iniinda
Walang kapaguran ka
Kay pati pagpaplantsa ginagawa

Ikaw na matiyaga magturo sa takda
Sumusuporta sa aktibidad
Na gusto ko palaging ginagawa
Nagpapasaya pag nasa kalungkutan
Nagpapayo para tamang landas ang paroroonan

Ikaw na nagpapatulog, ikaw na nagpapaaral
Ikaw na nagpapasigla
Ikaw na nagpatunay na
Kahit wala si Inaay Masaya
Oo papa, ikaw ay si mama

Natatanging Pilipino

Ni: Regine C. Catolico

Aking ipinagmamalaki an gating sariling lahi,

Kulay kayumanggi at ang ilong ay natatangi.

Oh sintang baying aking maituturing,

Yaman ng kultura na dapat ipagbunyi.

Perlas ng silanganan,Pilipinas ang aking bayan,

Iaalay ang aking buhay para sa nais na kalayaan.

Ligaya ang naramdaman nang laya ay nakamtan,

Ipinagbubunying lahi ,Pilipino ang angkan .

Namumukod tangi ang ganda ng mga Pilipina,

Oh ilaw kantang gamit sa panghaharana.

Nagniningning  sa kahit sinong makakita,

Gandang Pilipina na tunay na kakaiba.

Nararapat lang na magbigay pugay sa ating mga bayani,

Taglay na nasyonalismonng Pilipino ang naghari,

Alay sa bansanng aking ipinagmamalaki,

Tunay akong Pilipino dahil dito aq lumaki.

Ako’y tatayo at aking sasambitin,

Natatangi ako kahit kanino’y aking sasabihin,

Ganda ng kultura aking sisipiin,

Isusulong ko ang diwang Pilipino na dapat buhayin.

ITO ANG PAMILYA KO

ni Karen F. Fababeir

Masaya, maharot, at maingay

ganyan ko mailalarawan ang pamilya ko

Masaya pag magkakasama

Maharot pag nagkakatuwaan

at Maingay pag nasobrahan

Si Tatay,

Mabait , makulit pero malambing

"The Best Carpenter" para samin

magaling magplano ng buhay at ng bahay

nag-iisang asawa at ama ng aming buhay

Si Nanay.

ang nag-alaga at nagpalit ng lampin namin

ang "Cook" ng pamilya namin

siya at nagpapakulay at nagpapasarap ng bawat pagkain

Ang nagpapataba sa kuya at tatay namin

Si Ate,

ang pinakamaliit yata sa pamilya namin

wala siyang katulad para sakin

"TheBest Sister and Adviser" para sakin

responsable,mapagmahal, at maalalahanin

Si Kuya,

mataba, matakaw, at "Talented"

Magaling kumanta ,sumayaw at magpatawa

Siya rin ang nakamana ng galing sa pagluluto ni Ina

di maipagkakailang Siya ang pinakamalusog sa pamilya

at Ako,

ang bunso ng pamilya

makulit, maharot at maliit

nagmana sa tatay kong singkit

kahit wala namang lahing Intsik

Ito ang pamilya ko

tulad mo, Mahal ko ang pamilya ko

kaya't iniingatan ko

at pinapahalagahan ko

ang bawat miyembro nito

Ating tandaan,

Ang pamilya ay mahalaga

pangalawa sa Diyos na may lalang

Kaya't ingatan natin ito

at mahalin ang bumubuo rito.

ni Karen F. Fababeir

SASAKYANG PINOY

Pipip...Pipip

Ang tunog na lagi kong naririnig

sa pagpasok sa umaga at hanggang sa pag-uwi mula eskwela

laging punuan, at laging siksikan

dahil sa mga estudyanteng nag-uunahan

Kahit saan ka lumingon ay makakakita

ng sasakyan na pang-masa at nakikiisa

sa mga Pilipinong dukha at maralita

maging sa mga Pilipinong nakaririwasa

Ito ang dyip na pang-Pinoy talaga

May iba't ibang uri at anyo ang sasakyang ito

May maiksi, may mahaba, at ang iba ay sakto

para sa mga magbabarkadang nais umarkila rito

totoong makikita mo lamang ito

sa lupang sinilangan ko

Noon, ang sasakyang ito

halos iisa lamang ang anyo

Simple, at di kalakihan

Sapat lang para sa sangkatauhan

maging ang pamasahe ay tama lang

Ang dyip sa panahon ngayon

ay malaki na ang pinagkaiba

ang dating simpleng sasakyang

ngayon,Makulay, malaki at maingay na

malayo sa nakasanayan ng ating Lolo't Lola.

Totoo na ba ito?

J. A. Luis

Magaling kumanta,

mahilig magpinta,

magandang magsulat,

isang pinagpala

at mapagpala sa iba.

Isa siyang kaibigan

Na palaging nariyan

Handa kang tulungan

Sa oras na kailangan

At hindi ka iiwan.

Salamat sa iyo,

kapag ako’y malungkot,

ika’y nasa tabi ko.

Kapag ako’y natatakot,

ika’y nagpapalakas ng loob ko.

Ano itong nadarama?

Sa bawat sandali

ika’y kasama…

Mga ngiti sa labi’y

hindi mawala.

Kapag ika’y kausap,

ako’y kinakabahan.

Tila nasa alapaap…

kapag iyong tinititigan,

at panay ang sulyap.

Tila ka isang gamot.

Kapag nariyan…

Ako’y nakakalimot,

Walang pakialam

At walang takot.

Hindi ko alam

Kung kalian,

Paano at saan

Ko ito unang nadama…

Nangyari nalang basta.

Maraming salamat

At iyong pinadama…

Ang aking hinahangad

Mula sa iyo sinta.

Wagas na pag-ibig at tapat.

Kulay Kayumanggi

Ni: Judy A. Belleza

Kayumanggi ang kulay ko

Kulay na bigay ng bayang sinilangan ko

Kulay ng lahing pinanggalingan ko

Kulay ng ating mga katutubo

Kulay ng lahing Pilipino

Hindi puti...

Na nais ko...

Hindi maputla...

Na ginagaya ko...

Kayumanggi ang kulay ko.

Kayumanggi ang kulay ko

Kulay ng mga taong bilad sa ilalim ng tirik na araw

Kulay ng mga taong banat ang buto

Kulay ng mga taong salat sa yaman

Kulay ng bansang mahirap.

Ang kulay ng mga masisipag...

Upang may maihain sa hapag.

Ang kulay ng inaalipin at nagpapaalipin...

Upang may maisagot sa gastusin,

Kulay kayumanggi, ito ang kulay ko.

Ang kulay na kinaiinggitan ng lahing kanluranin,

Ang kulay na ating ipinagmamalaki,

Ang kulay na aahon kay Juan Dela Cruz at sa lahing Pilipino,

Ang kulay ng mga masisipag...

Kulay kayumanggi.

Pagkakakilanlan ni Juan

 Ni Princess Joy C. Ragsac

Kung sa Pilipinas ay pupunta,

Matutuwa sa iyong makikita,

Pagmamahal ay madarama

Sa mga Pilipinong makakasama

Pagkat kaugalian na, pagistima sa bisita.

Kaugalian rin ang pagiging matulungin

Kusang loob, di mo man sabihin.

Paghihirap ay kayang tiisin,

Masipag, masinop sa kanilang gawain

Makamit lang ang anumang naisin.

Pagmamano sa nakatatanda

Di na rin mawawala.

Pagsambit ng po at opo nakasanayan na,

Gayundin ang paggamiti ng ate’t kuya

Na syang  paraan upang paggalang ay ipakita.

Pagbibigkis ng pamilya talagang kay higpit,

Sama-samang haharapin problemang sasapit.

Anumang pagsubok ay kakayanin,

Lakas-loob  na sasalubungin,

Pagkat alam na Diyos ay nais lang silang subukin.

Juan dela Cruz ang aking ngalan

Isinaad ko’y aking katangian.

Ang tulang ito’y sa kapwa ko nakalaan

Upang malaman kanilang pagkakakilanlan

Sa bansang ito na kanilang kinalakihan.

Pinoy sa Buwan ng Ber

  ni Princess Joy C. Ragsac

Sa pagsapit ng ber tiyak ika’y matutuwa

Mga disenyo sa paligid iyo ng makikita

Nagbebenta ng dekorasyon, nakahanay na,

Kung san masasaksihan diskarte ng tindero’t tindera

Na abala sa pagkumbinsing bumili ang madla.

Mga Christmas tree na iba’t iba ang laki

Tila may parada sa sobrang dami,

Di mapipigilang Pilipino’y bumili

Sapagkat sa bagay na ito hatid ay ngiti

Na mamumutawi sa ating mga labi.

Mga awiting pampasko iyo na ring maririnig.

Di mapipigilan ang puso mong umantig,

Masasariwa sa isip mga batang humihimig

Na  sasabayan ng maganda mong tinig,

Habang umiihip ang hanging malamig.

Pinoy  ka ngang  talaga,

Kung ber pa lang pinaghahandaan na

Paskong sasapit sa tuwi-tuwina.

Nagsisimula na ring mag-ipon ng pera

Upang may ipanghanda sa noche buena.

Pasko sa Pinas talaga namang kay saya

Pagod at sakripisyo di alintana.

Pagkapanganak kay Kristo ginugunita

Di lamang sa araw na itinakda

Kundi sa simula pa lang ng ber na talaga namang kay haba.

Ligawan Noon!

J. A. Luis

Si Mariang kinagigiliwan,

Hinahangaan ng madla.

Ginto kung pakaingatan,

Tila tropeyong nais makuha,

Ng mga nabighaning kalalakihan.

Dahil si Juan,

Di pahuhuli

Kaya sa ligawan…

Pakulo’y nakawiwili,

talento’y hinahangaan.

Noon,

Manok di pa tumitilaok,

Si Juan ay nasa bakod.

Hinihintay ang pagbangon,

Ni Mariang iniirog.

Makita lamang…

Si Mariang inaabangan,

Ay tuwang-tuwa na si Juan.

Dahil kahit sandali…

Si Maria’y nakitang nakangiti.

Para kay Maria, Si Juan ay…

Nagsasalok ng tubig,

Nagsisibak ng kahoy,

Nag-aararo sa bukid,

Naghahanap ng bungang-kahoy.

Gabing pinahihintay…

Doon ipinakita,

Ni Juan kay Maria,

Talento sa paghaharana

Na may kasama pang gitara.

Ang oo’y narinig…

Kay Mariang mabait,

Ni Juang malupit.

Ang wagas na pag-ibig,

Sa wakas ay nakamit.

Harana, Nasaan Ka Na?

Karla Niña Bautista Mallannao

Hindi ba't kay sarap sa pakiramdam

Na ika'y hinaharana sa iyong tahanan?

Lalo na kung ang taong kumakanta

Ay ang taong iyo ring minamahal

Napakasarap pakinggan at magaan sa pakiramdam.

Ito ay nakaugalian na nating mga Pilipino

Ang panghaharana ng mga binatang may sinisinta

Kumakanta at naggigitara ang binata

Habang nakadungaw sa bintana ang dalaga

Ang eksena ay napakaganda.

Ngunit sa panahon ngayon

Ang panghaharana ay nawawala na

Dahil sa pag-unlad ng teknolohiya

Gamit sa panliligaw ay "Computer" at "CP" na

Nawala na ang kaugaliang tatak Pinoy talaga.

Para sa akin, harana ay mahalaga

Dahil dito napapakitang tunay talaga

Ang pagmamahal ng lalaki sa kanyang sinisinta

Ang paggamit ng "Hightech" ay di uubra

Para mapatunayang mahal ka talaga.

Nawa'y ang harana ay muling makita

Sa bawat paligid nitong ating bansa

At maibalik sa ating mga ala-ala

Na ito ay tatak Pilipino talaga

Kaya dapat paunlarin pa!

Pinoy, Ipagmalaki Mo To!

Karla Niña Bautista Mallannao

Isa ang Pinoy sa mga magigiting

Dahil sa pakikipaglaban sa mga dayuhan

Noong unang panahon ay pinatunayan

Na ang mga Pinoy ay may nasyonalismo

At tunay na minamahal ang bansang Sinilangan.

Hindi lang nasyonalismo meron ang mga Pilipino

Meron din namang mga pagkakakilanlan

Na taniging sa Pinas mo lang makikita

Tulad ng paggamit ng Jeep na sa Pinas mo lang mararanasan

At ang panghaharana sa sinaunang panahon hanggang ngayon.

Meron ding ugali ang mga Pilipino

Na kahit may problema man o wala

Ay hinding-hindi mawawala sa kanila

Ito ay ang pagiging masayahin nila

Na laging bitbit saan man magpunta.

Nariyan pa ang paggamit ng tabo ng Pinoy

Na isa ring pinagmamalaki nating mga Pilipino

Pati narin ang pagsasabi ng "Pst" at "Hoy"

Pantawag o pamalit sa pangalan ng isang tao

Hindi lang yan, marami pang iba.

Kaya naman lahat ng ito ay dapat ipagmalaki mo

Lalo na kung ikaw ay Pilipino

Ipagmalaki mo na kahit tayo'y mga Indiyo

Ay mayroon naman tayong mga prinsipyo

Na kakaiba at tanging Pilipino lang ang mayroon!