Ang hangad ko sa mga kapwa ko Pilipino...

Ni: Karla Niña Bautista Mallannao

Isang magandang araw sa lahat ng mga mahal kong kababayan. Isang malaking pasasalamat ang aking hatid sa inyo dahil hinayaan ninyo akong magsalita at handa kayong makinig sa aking mga sasabihin.

Sa panahon ngayon, napakaraming krisis at problema ang dumaraan sa ating bayan. Alam ko rin na hindi ito ganoon kadali para masolusyunan. Pero ngayon pa ba tayo susuko? Sa dami ng mga pagsubok na dumaan at nalagpasan natin, wala ng dahilan para tayo ay sumuko.

Kaya ngayon, sama-sama tayong sirain ang paniniwalang lalong humihirap ang Pilipinas dahil sa mga namumuno. Alam natin na ang mga Pilipino ay malalakas ang loob. Kahit ano pa man ang damang pagsubok ay hindi sumusuko. Sama-sama nating tanggalin sa mga isipan ng mga dayuhan na ang mga Pilipino ay Indiyo.

Alam ko na kayo ay nag-aalinlangan sa akin sapagkat ako ay isang babae. Alam naman nating lahat na malayo ang tingin ng mga tao sa babae sa mga lalaki. Dahil mas maraming kayang gawin ang lalaki kaysa sa aming mga babae. Pero nandirito ako sa inyong harapan upang sirain ang paniniwalang iyon. Papatunayan kong hindi lang dapat nasa bahay ang babae para mag-alaga ng mga anak at gumawa ng mga gawaing bahay. Papatunayan kong kaya naming mga babae na mamahala sa isang bayan at alagaan ang kanyang mamamayan gaya ng pag-aalaga niya sa kanyang mga anak at pagtupad sa kanyang mga tungkulin gaya ng pagtapos niya sa mga gawaing bahay.

Hindi ako nangangako, bagkus ay gagawin ko na lamang ang aking makakaya. Kung hindi man ako manalo ay patuloy parin akong tutulong para mapaunlad ang ating bayan upang mapatunayan kong hindi lang pera ang habol ko sa pagtakbo bagkus ang hanap ko ay kaunlaran, kapayapaan at pagkakaisa ng bawat mamamayan at ng ating bayan. Maraming Salamat po!

Produktibong Pinoy

Ni: Karla Niña Bautista Mallannao

Bilang isang Pilipino, ipinagmamalaki ko ang aking lahi. Lalo na ang mga identidad na kakaiba at tanging mga tunay na Pilipino lang ang mayroon. Hayaan po ninyong ihain ko sa inyo ang ilan sa mga katangi-tanging pagkakakilanlan ng Pilipino.

Ngunit bago ang lahat, isang napakasing na araw po sa lahat ng naririto. Isa sa mga identida ng mga Pilipino ay ang pagiging magalang. Likas na sa ating mga Pilipino ang pagsabi ng "po" at "opo" sa mga mas nakatatanda sa atin. Paggalang na maituturing ang pagsasabi ng "po" at "opo" sa mga di natin kakilala. Kusang lumalabas at likas na sa ating mga labi ang mga salitang ito. Paggalang din ang pagmamano sa mga mas nakatatanda sa atin. Ngayon, unti-unti ng nawawala ang ganitong senaryo. Ngunit umaasa ako at alam ko na hindi na ito mawawala sa isip at damdamin ng mga Pilipino.

Isa pa sa hinahangaan ko sa mga Pilipino ay ang pagiging magiliw sa mga bisita. Kilala tayo sa pagiging "Hospitable". Ang matinding pag-aasikaso sa mga bisita tuwing sila ay may kailangan. Isa pa sa mga patunay ng pagiging magiliw ng mga Pilipino ang pagsalubong at pagsabit ng kwintas na gawa sa mga bulaklak para sa mga dayuhang pumupunta sa ating bansa.

At ang pangatlong pagkakakilanlan na pinakapaborito ko sa lahat ay ang pagiging masayahin nating mga Pilipino. Marami ng napatunayan ito. Dahil alam naman natin na kahit hindi gaanong kaunlad ang ating bansa at kahit sa kaliwa't kanang mga problema ay hinding-hindi parin nawawala sa mga Pilipino ang ngiti sa kanilang mga labi. Patunay din ito na tayo ay naniniwala at nananampalataya sa Diyos. Tayo ay naniniwala na ito ay pagsubok lamang Niya at matatapos din ang mga problema dahil may Diyos na gumagabay sa atin.

Ilan lamang yan sa mga patikim na identidad nating mga Pilipino. Hindi lang ang mga iyan ang dapat ipagmalaki nating mga Pinoy. Lagi lang nating tatandaan na ang mga Pilipino ay isang tunay na produktibong tao. Maraming Salamat po!

SARILING WIKA: Daan sa Pag-unlad ng Bansa

Ni: Karla Niña Bautista Mallannao

"Ang hindi magmahal sa sariling wika ay higit pa sa hayop at malansang isda."

Isang pagpupugay at pagbati ng magandang araw sa lahat ng nandirito ngayon sa seminar na ito. Una sa lahat, nais kong magpasalamat sa mga tao na nasa likod ng programang ito at sila ay nagtiwala sa aking kakayahan at ako ay kanilang inanyayahan sa isang napakabuluhang araw na ito. Isang malaking pribilehiyo para sa akin ang maging ispiker sa isang Seminar. Ito ang unang pagkakataon na ako ay magsasalita at naimbitahan sa isang seminar kaya dama ko ang kaba sa aking dibdib pero gagawin ko ang lahat ng aking makakaya upang di ninyo pagsisihan ang pakikinig sa akin.

Ang mga katagang aking nasambit sa aking panimula ay may kinalaman sa aking talumpati. Alam naman natin na ito ay patungkol sa ating wika. Ang ating pagmamahal sa wika. Sinusukat nito kung gaano natin kamahal, kahalaga at ipinagmamalaki ang Wikang Filipino.

Ang Pilipinas ay tunay na kakaibang bansa. Hindi lang dahil sa mga natatanging pagkakakilanlan natin ngunit pati na rin ang ating wika.

Ang Pilipinas sy isang bansa na hindi lang nag-iisa ang dayalekto. Dahil tayo ay maraming dayalekto na ginagamit. Dapat natin itong ipagmalaki sapagkat patunay ito na tayo ay mayaman at maunlad sa larangan ng wika. Sa halip na gamitin ang mga banyaga at dayuhang wika, ating pagyamanin , pagyabungin at paunlarin pa ang mga dayalektong tunay na sa atin!

Ngunit isang patunay na dapat nating ipagmalaki ang pagiging Pilipino natin ay hindi lang ang mga dayalekto ng ating bansa ang kaya nating gamitin. Sa katunayan, ay maraming Pilipino ang mahuhusay sa pagsasalita ng ibang mga lenggwahe lalo na ng ating "universal language", ang Ingles. Hindi lahat ng mga dayuhan at banyagang tao ay magaling sa pagsasalita ng Ingles.

Bago ko tapusin ang aking talumpati sa araw na ito ay may iiwan akong isang mahalagang bagay na tatatak sa ating isipan. Dapat nating mahalin ang ating sariling wika dahil ito ay daan patungo sa pag-unlad ng ating bayan.

Kabataan, May Pag-asa Pa!

Ni: Karla Niña Bautista Mallannao

Isang pagbati sa aking mga minamahal na kamag-aral at guro. Ako ay nasa inyong harapan upang talakayin ang isa sa mga identidad ng mga Pilipino. Ito ay ang mga kabataan sa Pilipinas.

Isa sa mga binitiwang mga salita ng ating bayani na si Dr. Jose P. Rizal ay "Ang mga kabataan ay ang pag-asa ng bayan." Ngunit hanggang ngayon kaya ay matuturing parin nating pag-asa ang mga kabataan?

Dati, ang mga kabataan ay tunay na pag-asa ng bayan. MATULUNGIN at MASIPAG. Sila ay tumutulong sa kanilang magulang sa mga gawaing-bahay. MASIPAG na MAG-AARAL. Nag-aaral ng mabuti para sa kanilang kinabukasan. Mga katangian na nagpapatunay na sila ang magpapaunlad ng ating bayan.

Ngunit ang kabataan ngayon, nadala rin ata sa pag-unlad ng mga teknolohiya. Dahil dito, hindi na sila nakatutulong sa kanilang magulang sapagkat sila ay nasa harap ng kompyuter o di kaya ay maghapong hawak ang kanilang mga "cellphone". Dahil din dito ay hindi na sila nakapag-aaral ng maayos sapagkat puro laro na lang sa kompyuter at paglibot sa FACEBOOK, TUMBLR at TWITTER ang kanilang ginagawa sa halip na gumawa ng kanilang mga takda. Nariyan pa ang maagang pag-aasawa dahil sa relasyon na nauuwi sa maagang pagbubuntis.

Kaya ko iyan sinasabi sa inyo dahil tayo ang magsasalba ng problema sa kabataan. Alam kong hindi pa huli ang lahat. May magagawa pa tayo para mapigilan ang problema ng mga kabataan. Tulungan natin sila na pumunta sa tamang landas. Kung kayo ay may mga kaibigan na may ganitong problema ay inyong kausapin. Nang sa gayon ay unti-unting matapos ang problemang ito.

Na sa ating mga kamay din ang solusyon para sa problemang ito. Kaya para sa mga kapwa ko kabataan, tayo ng pumunta sa tamang landas. Maraming Salamat sa inyong pakikinig.

Pilipino, nag-iisa lang sa Mundo

Ni Karla Niña Bautista Mallannao

Ang mga Pilipino ay isa sa mga kakaibang nilalang dito sa mundo. Dahil ito sa maraming pagkakakilanlan nila. Eh ikaw bilang isang mamamayan ng Pilipinas, paano mo nga ba masasabi na ikaw ay isang tunay at may tatak na Pilipino?

Pilipino ka kung ikaw ay kumakain ng balot. Alam naman nating lahat na tanging sa Pilipinas lamang ang may balot sa buong mundo. May mga pagkakataon pa nga na ang mga dayuhan na pumupunta dito ay hindi nakaliligtas na matikman ang isa sa mga espesyal at tatak na pagkain ng mga Pilipino, ang balot. Ngunit hindi naman sila nagkamali na ipatikim ito sa kanila dahil kahit sa una ay nandiri sila ay nasarapan pa rin naman sila dito.

Pilipino ka kung ikaw ay masayahin. Isa ito sa mga mga positibong kaugalian ng mga Pilipino. Kahit na sa dami ng problemang kinakaharap n gating bansa ay hindi pa rin nawawalan ng pag-asa. Bagkus ay dinaraan natin ito sa pag-ngiti na lamang. Dahil alam natin na mayroong Diyos na nariyan upang gabayan tayo sa anumang pagsubok na dumaan sa atin.

Pilipino ka kung ikaw ay sumasakay sa Jeep. Tanging sa PIlipinas lang ang may sasakyan na Jeep. Taxi, Bus at iba pang mga sasakyang pang-transportasyon ay sa ibang bansa lamang makikita, ngunit meron din naman nito sa Pilipinas. Ngunit tanging ang Jeep lang ay tatak Pinoy talaga.

Pilipino ka kung ikaw ay marunong at nakaranas na ng Harana. Ang Harana ay isang tradisyon o kaugalian sa mga Pilipino. Ito ay ang panliligaw ng isang lalaki sa isang babae sa pamamagitan ng pagkanta. Ngunit ang kaugalian na ito ay unti-unti ng nawawala sa modernong panahon. Ngunit ako ay umaasa na ito ay hindi lubusang mawala sa ating bansa.

Pilipino ka kung ikaw ay gumagamit ng tabo. Tunay kang Pilipino kapag mayroong tabo sa inyong banyo. Hindi kagaya sa ibang bansa na may mga “Shower” at iba pang high-tech na kagamitan sa banyo.

Pilipino ka kung sa pagpatak ng “Ber Months” ay nagsisimula na kayong maghanda para sa Pasko. Ang Pasko ang pinakamatagal na idinaraos na okasyon sa Pilipinas. Nagsisimula sa Setyembre at natatapos sa buwan ng unang lingo ng Enero sa susunod na taon.

Pilipino ka kung ikaw ay magalang. Bukod tanging mga Pilipino lamang ang nagsasalita ng “po” at “opo”. Isang pagpapakita rin ng pagkamagalang ng mga Pilipino ang pagmamano. Sa Pilipinas ka lang makakakita ng ganyang pagkakakilanlan.

Pilipino ka kung ikaw ay magiliw sa pagtanggap ng mga bisita. Kilalang kilala ang mga Pilipino sa pagiging “Hospitable”. Kapag may mga okasyon ay lumalabas ang ganitong mga kaugalian ng mga Pilipino. May pagkakataon din na pag may mga dayuhang pumupunta dito ay sasabitan nila ng mga bulaklak bilang pagtanggap sa kanila.

At higit sa lahat, Pilipino ka kung ang balat mo ay kayumanggi at ang ilong mo ay pango. Tanging mga Pilipino lang ang may ganyang anyo dito sa buong mundo.

Kaya kung ang mga ito ay nagawa mo at meron ka, isa ka ngang tunay at tatak Pilipino.